Cannada
Ch't' articl'ye fut c'menchie en Jèrriais |
L'Cannada est un pays en Améthique du Nord. Ch'est iun des membres du Commonwealth. Ch'est l'deuxième pus grand pays du monde par tèrrain, mais n'est pon hardi apeuplyi.
Les provînches et tèrritouaithes du Cannada
[amendaer | modifier le wikicode]Provînches:
- Albèrta
- Île du Prînce Êdouard
- Nouvieau Brunswick
- Ontario
- Saskatchéouan
- Colombie Britannique
- Manitoba
- Nouvelle Êcosse
- Tchubec
- Tèrre-Neuve
Tèrritouaithes:
Histouaithe
[amendaer | modifier le wikicode]Lé nom Cannada veint d'un mot d'eune langue des Huthons-Irotchais tchi veurt dithe village. Ch'est en tchi l'habitants explyitchîtent à Jacques Cartier coumme tchi aller à la Ville dé Tchubec - i' prînt l'mot pouor tout l'tèrritouaithe.
Cannada a 'té habité d'pis 10,000 ans. Les preunmié v'nus d'l'Ûrope 'tait les Vikings tchi laîssîtent des êqu'sîns d'bâtisses ès côtes. En 1497, il est probabl'ye qué Jean Cabot arrivit en Tèrre-Neuve, épis Jacques Cartier explôrit l'pays en 1534 et Samuel de Champlain en 1603. Les preunmié colonnistes Ûropéens pèrmanents 'taient des Français en 1604. Des colonnies Britanniques et Françaises fûtent fondées et v'là tch'êtibotchait du hèrtchîn entré les deux pays. La France cédit la Nouvelle Êcosse au Rouoyaume Unni en 1713, épis toute la Nouvelle France en 1763.
Quand l's Êtats Unnis d'Améthique dêcliathîtent lus îndépendence, la dgèrre tchi siévit cachit un tas d'gens louoyaux à la Couronne au Cannada. Tchiques colonnies fûtent fondées et r'organnîsées dans l'Améthique du Nord Britannique jusqu'en 1867 quand eune conféthence dé politiciens Cannadgiens accordit la criâtion d'eune confédéthâtion Cannadgienne. La Donminnion d'Cannada fut grée. En 1919, l'Cannada d'vînt un membre d'la Ligue des Nâtions, et en 1926 la Conféthence Împériale accordit l'gouvèrnément dé sé ès Donminnions. L'Cannada appouaintit san preunmié ambassadeu en 1927 (ès Êtats Unnis). La citouoyenneté Cannadgienne fut êtablyie en 1947, et en 1982 l'Rouoyaume Unni r'nonchit l'pouvé d'changi la constitution Cannadgienne (tch'il avait gardé car les provînces n'lus accordaient pon au temps pâssé tchi qui dév'thait aver chu pouvé-là).
La Tèrre-Neuve jouaingnit l'Cannada en 1949. Lé Tchubec a deux fais voté sus la tchestchion d'aver pus d'îndépendence (en 1980 et 1995)
Politique
[amendaer | modifier le wikicode]
Lé Cannada est eune fédéthâtion et un rouoyaume. Ch'est eune démocratie parlémentaithe et eune monarchie constitutionnelle. La Reine Lîzabé II est la Reine du Cannada, et l'chef d'êtat de facto est l'Gouvèrneux-Génétha, appouainté par la Couronne s'lon la d'mande du Preunmié Minnistre.
Tchultuthe
[amendaer | modifier le wikicode]Langues
[amendaer | modifier le wikicode]Lé Cannada a deux langues officielles, l'Angliais et l'Français, et un tas d'aut's langues pâlées par les preunmié nâtions et d's înmigrés.
Sŷmboles
[amendaer | modifier le wikicode]La couleu Cannadgienne - rouoge et blianche auve eune fielle d'êrabl'ye - fut haûlîndgie pouor la preunmié fais officiellement en 1965.
Lé diton officiel du pays est a mari usque ad mare ("d'la mé à la mé" en Latîn) tchi veint du Sieaume 72.
Sport
[amendaer | modifier le wikicode]Lé hockey sus gliaiche est un sport nâtionna.