William Faulkner

William Faulkner
William Faulkner in 1954, foto geneem deur Carl Van Vechten
Gebore	William Cuthbert Falkner (1897-09-25)25 September 1897 New Albany, Mississippi
Sterf	6 Julie 1962 (op 64) Byhalia, Mississippi
Nasionaliteit	Verenigde State
Beroep	Skrywer
Bekend vir	The Sound and the Fury (1929) As I Lay Dying (1930) Light in August (1932) Absalom, Absalom! (1936) "A Rose for Emily" (1930)
Eggenoot	Estelle Oldham (h. in 1929)
Ouer(s)	Murry Cuthbert Falkner en Maud Butler
Handtekening

William Faulkner (25 September 1897 – 6 Julie 1962) was 'n Amerikaanse skrywer en Nobelpryswenner van Oxford, Mississippi. Faulkner het romans, kortverhale, draaiboeke, poësie, opstelle en 'n toneelstuk geskryf. Hy is veral bekend vir sy romans en kortverhale wat in die fiktiewe Yoknapatawpha County afspeel, en gebaseer is op Lafayette County, Mississippi, waar hy die grootste deel van sy lewe deurgebring het.

Faulkner het deur die merkwaardige vermenging van naturalisme, simbolisme en melodrama in sy werk van die grootste en boeiendste romans oor die suidelike state of die "Deep South" van die VSA geskryf. In 1949 het hy die Nobelprys vir Letterkunde ontvang vir sy omvangryke oeuvre.

Lewe

William Cuthbert Faulkner is op 25 September 1897 in New Albany, Mississippi, gebore. Na sy hoërskooldae het hy in sy oupa se bank gewerk en aan die Universiteit van Mississippi gestudeer. In die Eerste Wêreldoorlog was hy 'n luitenant in die Kanadese lugmag, hoewel hy geen aktiewe diens gedoen het nie, omdat vrede gesluit is voordat sy opleiding voltooi was. Na die oorlog was hy onder meer 'n matroos en skrynwerker voordat hy as joernalis na New Orleans is. Daar het Sherwood Anderson hom gehelp om sy eerste roman, Soldier's Pay (1926), te skryf.

Drie jaar later is hy terug na Oxford, Mississippi, waar hy met Estelle Oldham getroud is en as stoker begin werk het. Nadat hy as skrywer bekend geword het, het hy verskeie uitnodigings ontvang; 'n tyd lank was hy gasdosent in Japan en later ook aan die Universiteit van Virginia.

Faulkner se eerste werk, 'n digbundel getiteld The Marble Faun, is in 1925 gepubliseer. Sy tydperk in New Orleans word weerspieël in New Orleans Sketches, die satiriese roman Mosquitoes (1927) en Pylon (1935). Met Sartoris (1929) het hy sy bekende romansiklus begin oor die denkbeeldige Yoknapatawpha County, vandat die eerste setlaars daar aangekom het tot die middel van die 20ste eeu. In die siklus, waarin die gesinne Sartoris, Compson, McCaslin en Snopes sentraal staan, beskryf Faulkner die suide van die VSA, waar die ou tradisies ten gronde gaan weens die verderflike invloede van binne soos slawerny, die honger na grond, die Yankees se hebsug en die voorkoms van armblankes.

Die verhouding tussen Blank en Swart, Suide en Noorde, aristokraat en armblanke word gebruik om die tema van die verhouding tussen sosiale orde en natuurlike chaos uit te bou. In The Sound and the Fury (1929) word die verhaal op 'n tegnies interessante manier uit verskillende oogpunte beskou.

As I lay dying (1930) gaan oor die onderlinge verhoudinge in 'n gesin. In Sanctuary (1931) en die daaropvolgende Requiem for a Nun (1951) word die klem gelê op dekadensie en verderf, terwyl The Hamlet (1940), The Town (1957) en The Mansion (1959) veral oor die Snopes-gesin handel. Light in August (1932) word dikwels as sy grootste roman naas The Sound and the Fury beskou.

Van sy ander werk is onder meer Absalom (1936), The wild Palms (1939), A Fable (1954), The Rivers (1962), 'n bundel kortverhale Go down, Moses (1942), 'n digbundel The green bough (1933) en Essays, speeches and public letters (1965).

Geselekteerde lys van werke

• The Sound and the Fury (1929)
• As I Lay Dying (1930)
• Sanctuary (1931)
• Light in August (1932)
• Absalom, Absalom! (1936)
• The Wild Palms (1939)
• The Hamlet (1940) (deel van die trilogie oor die fiksionele Snopes-familie van Mississippi)
• Go Down, Moses (kortverhale, 1942)
• Intruder in the Dust (1948)
• A Fable (1954)
• The Town (1957) (deel van die drieluik boeke oor die fiksionele Snopes-familie van Mississippi)
• The Reivers (1962)
• The Mansion (1965) (deel van die trilogie oor die fiksionele Snopes-familie van Mississippi, ná The Hamlet [1940] en The Town [1957])

Rolprentverwerkings van sy werk

• Flesh (1932)
• Today We Live (1933)
• The Story of Temple Drake (1933)
• Submarine Patrol (1938)
• Air Force (1943)
• To Have and Have Not (1944)
• The Big Sleep (1946)
• Land of the Pharaohs (1955)

Bronnelys

• Wêreldspektrum, 1982, ISBN 0-908409-45-1 band

Eksterne skakels

• Wikimedia Commons het meer media in die kategorie William Faulkner.
• (en) "William Faulkner". Encyclopædia Britannica. Besoek op 4 September 2019.
• (en) William Faulkner by Find a Grave