Saraswati ([sə.rəs.ʋə.t̪iː]; Sanskrit: सरस्वती, sarasvatī; Thais, สุรัสวดี, Sarasawatee; Japannees :弁才天/ 弁財天 Benzaiten) is die Hindoegodin van kennis, musiek en die kunste. Saraswati word geïdentifiseer met die Vediese Saraswatirivier. Sy word gesien as die metgesel van Brahma, die Hindoegod van skepping. Dus vorm sy saam met Laksjmi en Parwati of Doerga, die Tridevi ("drie godinne"), wat die gades of metgeselle is van die manlike drieeenheidBrahma, Wisjnoe en Sjiwa onderskeidelik. Saraswati se kinders is die Vedas,[1] wat die oudste heilige geskrifte van Hindoeïsme is.
Saraswati is ook 'n figuur in Mahajana Boeddhisme, waar sy vir die eerste keer verskyn in die Goue Glans Soetra van die laat-4de of vroeë 5de eeu, 'n betreklik laat Mahajana Soetra.[2]
