Tina Turner
Tina Turner (fødd sum Anna Mae Bullock; 26. november 1939 í Brownsville, Tennessee, deyð 24. mai 2023 í Küsnacht nærhendis Zürich í Sveis), eisini kend sum 'the Queen of Rock 'n' Roll', var amerikonsk-sveisisk songkvinna, dansari, sangskrivari, sjónleikari og rithøvundur, ið hevur verið virkin í næstan sjey tíggjuáraskeið.[1][2][3]
Hon byrjaði sína yrkisleið í 1957.[1] Í 1960 byrjaði hon at upptraðka sum Tina Turner, saman við tónleikaranum Ike Turner. Tey giftust í 1962 og gjørdust víðakend í 1960-árunum undir heitinum Ike & Tina Turner Revue. Í mai mánaði í 1966 kom staklagið "River Deep – Mountain High" út. Á heysti í 1969 traðkaði hon upp saman við The Rolling Stones. Sangurin 'Proud Mary' frá 1971, sum er upprunaliga skrivaður av bólkinum Creedence Clearwater Revival, gjørdist størsta hittið hjá duoini Ike & Tina Turner. Tey fingu eina Grammy-virðisløn fyri sangin. (Best R&B Performance by a Duo or Group.). Ein annar kendur sangur frá 1970-árini er 'Nutbush City Limits', sum gjørdist í 1973 í Evropa eitt stórt hitt hjá Ike og Tina Turner. Tey skiltust tó í 1976 og Tina vildi halda fram sum solosangari. Í 1984 kom plátan 'Private Dancer' út, sum gjørdist størsta sukse í yrkisleið hennara sum sangari. Hon hevur selt meira enn 10 milliónir eintøk av plátuni um allan heimin. Sangurin 'What's Love Got to Do with It' frá plátuni kom á fyrsta plássið á Hot 100-listanum hjá Billboard. Hetta var fyrsta og einasta ferð, at hon megnaði tað. Í 1985 fekk hon tilsamans tríggjar Grammy-virðislønir fyri sangin 'What's Love Got to Do with It' og fyri plátuna 'Private Dancer'. Í 1986 fekk hon eisini eina stjørnu á Hollywood Walk of Fame.[4]
Síðan 1994 hevur hon búð í einum slotti nærhendis Zürich í Sveis, saman við unnusta hennara, týskaranum Erwin Bach. Hon fekk sveisiskan ríkisborgaraskap í 2013. Sama árið giftist hon umsíðir við Erwin. Tey møttust í 1986 og høvdu verið par í eini 27 ár.
Seinastu árini mátti hon tó stríðast móti kropsligum sjúkum av ymsum slagi. Hon andaðist í heimi sínum í Küsnacht í Sveis mikudagin 24. mai 2023, 83 ára gomul.
Ávísingar úteftir
[rætta | rætta wikitekst]- Heimasíða: tinaturnerofficial.com
- Tina Turner, imdb.com (á enskum)
- Stutt ævisøga: Tina Turner, walkoffame.com
Keldutilfar
[rætta | rætta wikitekst]- ↑ 1.0 1.1 Tina Turner er deyð, in.fo, 24.05.2023
- ↑ Tina Turner, 'Queen of Rock 'n' Roll', dies aged 83 in Switzerland, news.sky.com, 24.05.2023
- ↑ Tina Turner, imdb.com
- ↑ Tina Turner, walkoffame.com
