أعاد Career Opportunities Community نشر هذا
Senior Finance Student at FCES Cairo University | Founder of Career opportunities community | Oragnizer at ima | have more courses & interns experience in different fields
• واحدة من أهم الـ skills اللي هتكتسبها غصبا عنك في وقت أو آخر هي تقبل الهزيمة والخزوقة والتعامل معاهم بحرفية.. • the art of knowing when and how to concede • في بعض الأوقات كده هتضطر تخسر، هتضطر توقع حاجة، خلاص هي الدنيا مش ظابطة انت مش هتنجح فالكويز دا، مش هتعرف تتجوز البنت دي حاليًا، مش هتعرف تتمرن تمرينة حلوة النهاردة، مش هتعرف تخلص قبل الديدلاين، مش هتلحق القطر خلاص انت سامع صوته بيمشي، مش هتلحق تدوس فرامل خلاص هتاكل المطب ده و عفشة عربيتك هتتعور و تزعلك. • في الأوقات دي بتبقى الدعاوي المتفائلة دايمًا تجاه انك متتركش حلمك أبدًا ومتستسلمش وعافر لآخر نفس.. ولكن الحقيقة ان الدنيا مبتتاخدش كده.. مش بالعافية هي.. ومش بالاستسلام وعدم المحاولة من الأساس اكيد، ولكن بالموازنة بينهم • لحظة الصفاء النفسي اللي بتشوف فيها نفسك في انعكاس شاشة اللابتوب السوداء بعد المحاولة رقم 53 في تشغيل الكود عشان الديدلاين كمان ساعة، ولكن مفيش أمل، اللحظة اللي بتدرك فيها أن الخسارة حلّت بالفعل، وانها مسألة وقت قبل ماتشوف بعينك الـ portal بتقفل ودرجاتك بتتبعثر في كل مكان • في الوقت دا بيبقى قدامك حلين بس ملهمش تالت، يا تتقبل الهزيمة بروح حلوة، وتطبطب على نفسك وتقول معلش تتعوض، أو تسخط على نفسك وعلى العالم، وبدل ماتخسر جولة تخسر حاجات اكبر محتاجة فترات اطول بكتير عشان تتعالج • بعض المشاكل علاجها في النظر إليها، إدراك حقيقة وصولها، إدراك أنها بالفعل قد شقت طريقها إليك وأنه لا مفرّ الآن إلا بالتقبّل.. فترجع سيفك لجرابه، وتخلع عباءة المحارب، وتترك المعركة بما حملت، لأن القادم أهم، ولأنك أنت أهم.. ولأنك لو سقطت لخسرت كل معاركك قبل أن تبدأ.. فتجمع أشلاء ما بقى من روحك، وتبسط ذراعيك بالوصيد في بلاهة طفل لا يدرك أن المنزل قد أكلت جوانبه النيران بالفعل.. وتبتسم.. وتتقبل النواقص.. و تبدأ من جديد.. و تجرب تانى لحد ما تقابل نفس المطب تانى بس المره دى هتدوس فرامل و توصل سليم. - إبراهيم محمود