Firefox

Firefox
Firefox 57 op Windows 10
Ontwikkelaar	Mozilla-stigting/Mozilla Corporation
Nuutste weergawe	133.0 / 26 November 2024
Nuutste betaweergawe	134.0b9 / 11 Desember 2024
Programmeertaal	C++, JavaScript, C, Rust
Bedryfstelsel	Windows, OS X, Linux
Beskikbaar in	Afrikaans en baie andere tale
Kategorie	Webblaaier
Lisensie	MOL, MOL/GPL/LGPL trilisensie
Webblad	www.mozilla.org/en-US/firefox/new/

Mozilla Firefox, meer eenvoudig bekend as Firefox (oorspronklik bekend as Phoenix en kortliks as Mozilla Firebird) is 'n vrye kruis-platform-webblaaier wat deur die Mozilla-stigting en honderde vrywilligers ontwikkel word. Dit is meer as vyf miljoen keer in die eerste 12 dae ná die vrystelling van weergawe 1.0 afgelaai, en meer as 20 miljoen keer in minder as 11 weke daarna. Dit maak Firefox een van die mees populêre, gratis oopbronprogramme, veral onder tuisgebruikers.

Met Firefox beoog die Mozilla-stigting om 'n klein, vinnige, eenvoudige en hoogs uitbreibare webblaaier te ontwikkel wat onafhanklik van die Mozilla-suite staan. Firefox het die fokus van Mozilla-ontwikkeling geword, tesame met die Mozilla Thunderbird e-posleser, en het die Mozilla-suite vervang as die amptelike blaaier van die Mozilla-stigting.

Ondersteuning van Afrikaans

Die Mozilla-stigting het op 31 Mei 2007 aangekondig dat die Firefox-blaaier vir die eerste keer ook in Afrikaans beskikbaar is. Die blaaier word deur translate.org.za vir Afrikaanssprekendes gelokaliseer.

Die voordeel van so 'n blaaier is dat die koppelvlak in Afrikaans is, maar ook dat die taalvoorkeur outomaties na Afrikaans gestel is. Webtuistes wat in Afrikaans beskikbaar is, soos Google, Facebook en andere, sal dus outomaties in Afrikaans laai.

'n Afrikaanse speltoetser is ook beskikbaar wat spelfoute kan uitwys soos mens in teksareas tik.

Eksterne skakels

• Afrikaanse weergawe van Firefox
• Afrikaanse speltoetser vir gebruik in Firefox
• Firefox Help — Aanlyn hulp vir Firefox